Տեղական ընտրություններից հետո, երբ «Քաղաքացիական պայմանագիրը» կորցրեց իշխանությունը մեծությամբ երկրորդ քաղաքում, վարչապետ Նիկոլ Փաշինյանն առաջին անգամ Գյումրիում էր: Բայց դիմավորողների շարքում Գյումրիի քաղաքապետ Վարդան Ղուկասյանը չկար:
Երեկ մամուլում արդեն լուրեր էին շրջանառվում, որ Փաշինյանը հատուկ հրահանգել է, որ Ղուկասյանը չլինի դիմավորողների շարքերում: Չնայած այս հրապարակումներին, ինքը՝ Վարդան Ղուկասյանն «Ազատության» հետ զրույցում նախ զարմացավ, թե վարչապետը Գյումրիում է, հետո էլ պնդեց՝ տեղյակ չէ, հրավեր էլ չի ստացել. - «Մենք տեղյակ չէինք, որ Գյումրիում է, մեզ ոչ ոք ոչ մի բան չի ուղարկել»:
Այնինչ Շիրակի մարզի մյուս համայնքներում՝ Արթիկում, Ախուրյանում ՔՊ-ական համայնքապետերն էին դիմավորում կուսակցության ղեկավարին: Ի՞նչ է մտածում Ղուկասյանն այսպիսի տարբերակված մոտեցման մասին:
«Հիմա իրանք էդպես են մտածում, էդ մարդիկ խիստ կուսակցական են, ես ի՞նչ կարող եմ անել», - արձագանքեց Վարդան Ղուկասյանը:
Գյումրիի քաղաքապետը, ինչպես ընտրություններից առաջ ու հետո, հիմա էլ է պնդում, որ սուբորդինացիան կպահի, հրավիրեն, անպայման կգնա:
«Ասել ենք՝ երբ հրավիրեցին, մենք ի պաշտոնե կմասնակցենք, եթե չեն հրավիրում, մենք որպես ի՞նչ ենք գնալու», - ընդգծեց նա:
Իսկ թե ինչո՞ւ հրավիրված չէր Ղուկասյանը Գյումրիում կառուցված ու քաղաքապետարանի ենթակայությամբ գործող մանկապարտեզ Փաշինյանի շրջայցին, արդյոք իսկապես եղե՞լ է հատուկ հրահանգ, վարչապետի աշխատակազմից պարզել չհաջողվեց: Ամեն դեպքում՝ մամուլի երեկվա հրապարակումներին էլ չեն արձագանքել: Իսկ Փաշինյանը, որն այսօր՝ Շիրակի մարզ այցից առաջ ու դրա ընթացքում ֆեյսբուքում մի քանի աղմկահարույց գրառում է հեղինակել հոգևորականների մասին, անվտանգության խիստ հսկողությամբ եկավ, շրջեց ու «Ազատության» հարցերն անպատասխան թողեց, ասելով, թե այսօր չէ, բայց առաջիկայում հարմար առիթի կխոսի:
Փաշինյանը վաղ առավոտից էր Շիրակի մարզում: Մի քանի գյուղերի ու Արթիկ խոշորացված համայնքի նորակառույց մանկապարտեզներ այցելեց՝ ստուգելով կատարված աշխատանքը:
Ախուրյանում սուբվենցիոն ու պետական միջոցներով կառուցված ճանապարհները նայեց, Արեգնադեմ գյուղում էլ արդեն մի քանի տարի ձգձգվող դպրոցի շենքի շինարարությանը հետևեց: Գյուղերի բնակիչներին էլ հորդորեց՝ «եթե ուզում եք ձեր համայնքի խնդիրները լուծվեն, ապա հարկ վճարեք, խանութից ապրանք գնելիս պարտադիր ՀԴՄ կտրոն պահանջեք»:
Փաշինյանը հավանաբար հունիսին ևս Շիրակի մարզ կգա, այս անգամ տիկնոջ հետ՝ «Կրթվելը նորաձև» է ծրագրով, որը նախատեսվում է Մարալիկում անցկացնել: